Carteis Día das Letras Galegas

 

Entrevista a Daniel

Onte, 26 de abril, Radio Galega entrevistou a Daniel por ser o ganador do IV Concurso Literario sobre Protección de Datos. Podedes escoitar a entrevista se facedes clic na imaxe. A entrevista comeza un pouco antes dos quince minutos de programa.

 

Daniel Conde ganou o IV Concurso Literario sobre Protección de Datos

 Parabéns, Daniel!!! Estamos moi orgullosos!

Os enunciados

Grupo de sexto: Bo día!!! Comezamos un novo tema de lingua. Comprobade as correccións que vos fixen dos exercicios de competencia lectora: https://new.edmodo.com/post/764753280. A continuación, ides facer os exercicios do 1 ao 4 da páxina 121 para ampliar o vocabulario sobre a oficina e para coñecer e utilizar frases feitas (expresións que teñen un significado diferente ao que terían as palabras que as compoñen por separado; por exemplo: nacer con estrela é unha frase feita que significa ter sorte na vida, non nacer cunha estrela debaixo do brazo) e interxeccións (palabras exclamativas: ah!, ala!, vaites!). Por último, repasaremos as diferenzas entre as frases e as oracións. É algo básico: as oracións teñen unha forma verbal conxugada (Sol e nubes sería unha frase; Ela é Marta sería unha oración). As oracións, ao ter verbo, indican accións. A persoa, animal ou cousa que fai a acción sería o suxeito; a acción e todo o que a rodea (como, onde, cando se fixo...) sería o predicado. Faremos os exercicios do 1 ao 3 das páxinas 122 e 123 para repasar ben esta parte fundamental da gramática.

Palabras primitivas e derivadas

Grupo de quinto: Bo día!!! Comezamos un novo tema de lingua. Comprobade as correccións que vos fixen dos exercicios sobre a acentuación de ditongos e hiatos: https://www.edmodo.com/post/764766955. A continuación, ides ler un conto de misterio: "Os paraugas desaparecidos", nas páxinas 130 e 131 do libro. Esta vez, non teredes que facer exercicios de comprensión lectora. Por último, haberá que facer os exercicios do 1 ao 4 da páxina 133, para estudar o vocabulario sobre o tempo atmosférico e para repasar a formación de palabras (primitivas e derivadas), que acabamos de estudar en lingua castelá.

Acentuación de ditongos e hiatos

Grupo de quinto: Rematamos o tema coa parte de ortografía. Recordade que "a, e, o" son as vogais abertas e que "i, u" son as vogais pechadas. Dúas vogais abertas xuntas forman sempre un hiato: ma-re-a, por exemplo. Nun hiato, dúas vogais seguidas pertencen a sílabas diferentes. Unha vogal aberta máis unha pechada forman ditongo (pertencen a mesma sílaba: ca-mión, por exemplo), salvo que a pechada sexa tónica: dí-a. Estas son as normais fundamentais da acentuación de ditongos e hiatos. Para practicar esta parte de ortografía teredes que facer os exercicios do 1 ao 3 das páxinas 122 e 123 do libro. Aproveitade para comprobar as correccións que fixen dos exercicios sobre o adxectivo: https://new.edmodo.com/post/761278681.

O estraño empregado

Grupo de sexto: Hoxe imos ler un relato dun dos escritores galegos máis populares: Agustín Fernández Paz, que faleceu recentemente. Aproveitaremos para apreciar o papel fundamental que realizan os personaxes secundarios.
Ademais de ler o relato hai que facer os exercicos do 1 ao 6 da páxina 120.
Antes de comezar, comprobade as correccións dos exercicios anteriores de lingua galega: https://new.edmodo.com/post/761293121.

Os recursos literarios

Grupo de sexto: Boa tarde! Primeiro tedes que comprobar as correccións que vos fixen individualmente das tarefas sobre o apartado ortográfico da unidade: https://new.edmodo.com/post/758044708. Despois, pasamos á última parte do tema: os recursos literarios. Os textos literarios caracterízanse pola súa expresividade e fermosura. Para conseguir acadalas, os escritores utilizan varios recursos estilísticos. Algúns xa os coñecedes, aínda que non sexades moi conscientes deles, pero xa os lestes nalgúns libros con seguridade. Tedes que ler a páxina 112 do libro, e ao rematar deberedes facer os exercicios do 1 ao 4 das páxinas 112 e 113.

O adxectivo

Grupo de quinto: Primeiro tedes que comprobar as correccións que vos fixen individualmente das tarefas sobre o vocabulario da unidade: https://new.edmodo.com/post/757986939. Despois, leredes a páxina 120 do libro, que trata da parte de gramática do tema: o adxectivo. Como xa sabedes, os adxectivos sempre acompañan a un substantivo (palabra que nomea a persoas, animais, lugares, obxectos...) co que concordan en xénero (flor rosa) e en número (flores rosas). Ides repasar o que xa sabedes sobre o adxectivo, e a amplialo, estudando os seus graos: positivo, comparativo e superlativo. Por último, teredes que facer os exercicios do 1 ao 4 da páxina 121.

O relevo

Quinto de primaria: Hoxe imos estudar a parte de vocabulario dun novo tema: o relevo (accidentes como elevacións ou depresións que atopamos nun terreo). A maiores, imos repasar as familias de palabras: recordade que se diferencian dos campos semánticos en que coinciden parcialmente na forma todas as palabras da mesma familia. Tedes que facer todos os exercicios.

O son b. A grafía v.

Sexto: O apartado de ortografía deste tema trata sobre o son b que se representa coa grafía v. Tedes que ler a explicación da unidade (polo menos dúas veces, entendendo ben as normas ortográficas das que fala e tratando de memorizalas) e debedes facer tamén os tres exercicios da páxina 108.

Día das Letras Galegas

Dani fixo estes tres carteis sobre Ricardo Carvalho Calero nos que cita algunhas das súas obras como Sete poetas galegos ou Scórpio.

Cartel de Aridane

Ari elaborou este cartel para conmemorar o Día das Letras Galegas. Fixo un magnífico traballo.

Entrevista a unha alpinista

Grupo de quinto: tedes que ler esta entrevista coa alpinista galega Chus Lago e, despois, debedes facer os exercicios de competencia lectora do 1 ao 5 da páxina 118.

Os enlaces: preposicións e conxuncións

Grupo de sexto. Lingua galega: ides facer os exercicios 4 e 5 da páxina 105 para repasar os sinónimos e os antónimos. A maiores, tedes que ler a páxina 106 e que facer os exercicios 1, 2 e 3. É a parte de gramática do tema. Trata sobre os enlaces: palabras que unen outras palabras (libro DE papel) ou oracións (Ti escribes E eu leo). Hai dous tipos de enlaces: conxuncións e preposicións.

Carteis dixitais

Este ano, como xa sabedes, o Día das Letras Galegas estará dedicado a Ricardo Carvalho Calero. Aínda que a Real Academia Galega acordou pospoñer a homenaxe a Carvalho Calero ata o sábado 31 de outubro, o día 17 publicaremos algúns traballos sobre el nos blogs de aula e de biblioteca. Ides facer carteis sobre el. Tedes que usar esta ferramenta dixital para facer os carteis: https://es.postermywall.com/index.php/posterbuilder. Non é necesario que vos rexistredes nin que paguedes nada. Cando fagades o cartel hai que descargalo escollendo a opción básica, que é gratuita. Ao entrar na páxina web, seleccionades o modelo que máis vos guste para que despois poidades personalizalo. Outra opción é que creedes unha conta na plataforma de deseño gráfico Canva (https://www.canva.com/). Para facer carteis de calidade tedes que combinar símbolos da cultura galega con información sobre o autor homenaxeado. Déixovos algúns enlaces a carteis feitos por antigo alumnado meu noutro colexio. https://www.slideshare.net/alvaroinclan/carteis-dixitais https://www.slideshare.net/alvaroinclan/carteis-letras-galegas-2014 https://www.slideshare.net/alvaroinclan/carteis-da-das-letras-galegas-2015

Ricardo Carvalho Calero

Este ano o Día das Letras Galegas estará dedicado a Ricardo Carvalho Calero. A Real Academia Galega acordou pospoñer a homenaxe ao escritor nado en Ferrol ante a situación provocada pola pandemia da COVID-19. A sesión da RAG na que se fará a homenaxe trasladarase do domingo 17 de maio ao sábado 31 de outubro. Así a todo, o día 17 publicaremos algúns traballos sobre el no blog de biblioteca. Imos comezar investigando un pouco sobre a súa vida e facendo uns exercicios interactivos sobre a súa biografía. Grupo de quinto:http://seminariogalan.org/inicio/ver/471 Grupo de sexto: http://seminariogalan.org/inicio/ver/472

Paseo rural (diario de Dani)

O domingo 26 de abril de 2020 deixáronos saír á rúa aos nenos e nenas de España de 14 anos, ou menos, pero coa fácil e sinxela regra dos catro uns. Eu, o domingo, fun co meu pai e coa miña cadeliña Lúa ao monte, a dar un paseo por un sendeiro preto da casa. Tardamos uns corenta e cinco minutos en dar unha volta enteira... Non vimos a ninguén e non infrinximos ningunha norma.

Daniel Conde Rodríguez 

Libro de cómics sobre "O principiño"

As luces que se acenden e se apagan

A contacontos María Xosé Martínez contou este relato de Ramón Trigo hoxe pola mañá para celebrar o Día Internacional do Libro.